المساء الحزين

...
في ذلك المساء الحزين
المعتّق بألم الفقد والفراق الأبدي
إنهمرت الدموع دون هوادة لفقد خالي ( ابومنصور )
ذلك الإنسان الطّيب الذي كان دائماً وأبداً
يشعرني بمشاعر الأبوة الحانية والمحبة الصادقة
خاصة بعد رحيل والدي رحمهما الله جميعاً
إفتقدت خالي الذي يحمل بين جنبيه كنزاً من الطّيبة والوفاء
توقف نبض قلبه الطاهر وهو ينضح بالحب والحفاوة لكل الناس
توقف قلبه الأبيض ورحل عن هذه الدنيا الفانية
بعد معاناة مع المرض
ورغم رحيله بقيت سجاياه وذكراه الجميلة
تعطر الزمان والمكان
ومن باب الحب والوفاء والعرفان كتبت هذه الخاطرة :
.
طفت شمعة الدار واختفى النور
وجف بحر الطيب اللي يذكرونه
خلاص الطيب مات مع أبو منصور
ونهر الوفا تغير طعمه ولونه
يا ( عادل ) هل الدمع تراك معذور
من فقد غاليه الناس بيعذرونه
هيجت دمعي وخاطري المكسور
وعبراتي داخل الصدر مسجونه
أه من دنيا تصف الحزن بالدور
كل ماهانت بيّح الدهر مكنونه !!
نعى فرقاه حمام الورق والطيور
والشجر مات ويبست غصونه
لو بالتمني ماسكن في قبور
لكن آمنت باللي الخلايق يعبدونه
منزله في الحشى وحنايا الصدور
ومسكنه في قلوب ناسٍ يحبونه
لولا الدفن في شرع الله مذكور
قلت كنز الطيب لا تدفنونه
يالله جعل ماجاه تكفير وطهور
في يومٍ كل الخلايق يهابونه
ماهمّته دنياه وحب الظهور
يشهد له بالتواضع اللي يعرفونه
فيه طيبه تملا وديان وبحور
يعرف حق الجار ولايمكن يخونه
يفرح بكل من جاه ويقدم الميسور
والضيف لامن لفاه يسوى عيونه
حسيت أني غريب احساس وشعور
يوم دخلت البيت من دونه
نهار الجمعه تخيلته ضمن الحضور
يهلّي ويرحب باللي يزورونه
تلفتت نظراتي تلف وتدور
وعودت عيني بالحزن مطعونه
تخيلت سواليفه معنا في السور
وضحكة سنه ومزحه وفنونه
هذا مكانه وهذي دلته والبخور
مع بقايا من عطره ودخونه
ياخال حلّلنا لو كان بدا قصور
ترى الهفوات ماهيب مامونه
البيت بليا راعيه تقول مهجور
ماينبغى لو بالذهب يبنونه
يالله عساها تباشر به الحور
وفي جنة الخلد أحبابه يلاقونه
ياخالتي أنا أشهد انك صبور
تخفين الدمع والروح محزونه
خالي رحل وخلّف لنا صقور
يصيدون الطّيب وللغير يهدونه
خلّف رجال كبيرهم منصور
درب المواجيب والعز يدلونه
صلاة ربي عد ماأشرق النور
على نبي بخير الهدى يتبعونه